வரத்து, உபரிநீர் கால்வாய்கள் இன்றி கரைகள் உடையும் அபாயம்

காமயகவுண்டன்பட்டிக்கும், நாராயணத்தேவன்பட்டிக்கும் இடையே 40 ஏக்கர் பரப்பளவில் உள்ளது கேசவபுரம் கண்மாய். 20 ஆண்டுகளுக்கு முன்பே இக் கண்மாயின் ஒரு பகுதியில் சுமார் 10 ஏக்கர் ஆக்கிரமித்து பலன் தரும் மரங்கள் வளர்க்கப்பட்டுள்ளன. பொதுமக்கள் பல முறை கோரிக்கை விடுத்தும் ஆக்கிரமிப்பு அகற்றப்படவில்லை.

சுருளிப்பட்டி, நாராயணத்தேவன்பட்டி, காமய கவுண்டன்பட்டி, அணைப்பட்டி வரை உள்ள நூற்றுக்கணக்கான விவசாய கிணறுகளுக்கு நிலத்தடி நீர்மட்டம் உயர இக் கண்மாய் ஆதாரமாக உள்ளது. மேலும் கோடை காலங்களில் கால்நடைகளுக்கு குடிநீர் தேவையை போக்குகிறது. மேகமலையில் பெய்யும் மழை நீர் கூத்தனாட்சி வாய்க்கால் வழியாக இக் கண்மாய்க்கு வருகிறது. கூத்தனாட்சி வாய்க்கால் வழியாக தண்ணீர் வரும் 2 கி.மீ. தூர வரத்து வாய்க்காலில் செடி, கொடிகள் வளர்ந்துள்ளதால் தண்ணீர் வர வழியில்லாத நிலை உள்ளது. சமீபத்தில் விவசாயிகள் சொந்த பணம் செலவழித்து வாய்க்காலில் இருந்த செடி கொடிகளை அகற்றினார்கள். ரூ.40 லட்சத்தில் கண்மாய் பராமரிப்பு பணிகள் நடந்தது. தண்ணீரை வெளியேற்றுவதற்கான வாய்க்கால் அமைக்க வில்லை. வாய்க்கால் செல்லும் வழியில் உள்ள நிலங்களில் சர்வே செய்து நிலத்தை எடுத்து வாய்க்கால் அமைத்துக் கொள்ளுங்கள் என விவசாயிகள் கூறிய பின்பும், அதிகாரிகள் அந்த பணியை மேற்கொள்ளாததால், தண்ணீர் வெளியே செல்ல வழியில்லை. இதனால் கண்மாய் குப்பைகளை கொட்டவும், தென்னை கழிவுகளை கொட்டும் இடமாக மாறி விட்டது.