இளம் வயதினர் தற்கொலையை தடுக்க விழிப்புணர்வு திட்டம்: மாவட்ட மனநல மருத்துவர் தகவல்

பெரியகுளம் மாவட்ட அரசு தலைமை மருத்துவமனையில் மனநல மருத்துவ சிகிச்சை மையம் இயங்குகிறது.இங்கு 50 படுக்கை வசதிகள் கொண்ட மனநல மறுவாழ்வு சிகிச்சை மையமும், உடனடி சிகிச்சை பெறுவதற்கான 10 படுக்கைகள் கொண்ட வார்டும் இயங்குகிறது. மாவட்ட மன நல அலுவலராக டாக்டர் கோரா ராஜேஷ்தலைமையில் 7 மனநல நிபுணர்கள், 5 நர்ஸ்கள், களப்பணிக் குழுவினர் இயங்கி வருகின்றனர். 2023 ஜன.1 முதல் தற்போது வரை மனநல மறுவாழ்வு சிகிச்சை மையத்தில் 228 பேர் அனுமதிக்கப்பட்டு உள்ளனர். இதில் 146 பேர் குணமடைந்து உறவினர்களிடம் ஒப்படைக்கப்பட்டு உள்ளனர். 42 பேர் வீட்டிற்குசென்றுள்ளனர். குணமடைந்து உறவினர் விருப்பம் தெரிவிக்காத நிலையில் மறுவாழ்வு மையத்திற்கு சென்றவர்கள் 11 பேர், வார்டில் 29 பேர் தற்போது சிகிச்சை பெறுகின்றனர்.

தினமலர் நாளிதழின், அன்புடன் அதிகாரி’ பகுதிக்காக மாவட்ட மன நல அலுவலர் பேசியதாவது:

இளம் வயதினர் தற்கொலை அதிகரிக்க காரணம் என்ன

நமக்கு இறைவன் கொடுப்பது இயற்கை மரணம். ஆனால் மாநிலத்திலேயே நமக்கு நாமே மரணத்தை கொடுக்கும் தற்கொலைகள் செய்து கொள்வதில் தேனி மாவட்டம் 5 வது இடத்தில் உள்ளது. கடந்த 2024 அக்டோபரில் துாக்கிட்டு தற்கொலைக்கு முயற்சித்து சிகிச்சை பெற்று இறந்தவர்கள் 10 பேர், நவம்பரில் 11, டிசம்பரில் 11, ஜனவரியில் 15 பேர் என கடந்த 4 மாதங்களில் 47 பேர் தற்கொலை செய்துள்ளனர். இதுவே விஷம் குடித்து 4 மாதங்களில் 54 பேரும், நீர்நிலைகளில் தற்கொலை செய்வதற்வர்கள் 14 பேர், தீக்குளித்து 9 பேர் தற்கொலை செய்துள்ளனர். இது தேனி மருத்துவக்கல்லுாரி மருத்துவமனை விபரங்களில் தெரிவிக்கப்பட்டுள்ளது. இதில் மன அழுத்தம் உயர்ந்து அதிகபட்சமாக 54 பேர் விஷம் குடித்து தற்கொலை செய்துள்ளதுள்ளனர். இதில் தற்கொலை முடிவு எடுத்து இறந்ததில் பெண்களின் சதவீதம் அதிகம். இதனால் விழிப்புணர்வு ஏற்படுத்தி தற்கொலைகளை தடுக்க வேண்டிய கட்டாயத்தில்மாவட்ட நிர்வாகம் பிற துறைகளுடன் இணைந்து செயலாற்றுவது கட்டாய தேவை உள்ளது

சமீபகாலமாக குடும்ப நடைமுறையில் விட்டுக்கொடுத்தல் பண்பு’ இல்லாமல் உள்ள இளம் வயதினரை அதிகளவில் பார்த்து வருகிறோம். இதற்கு முக்கிய காரணம் போதை பழக்கம் அதிகரிப்பு, எதிர்பாலின ஈர்ப்பு மூலம் காதல் வயப்படுவது, அது இருவீட்டார் மத்தியில் ஏற்கப்படாமல் இருப்பது, பொருளாதார நெருக்கடி, பணிச்சூழல், பணிச்சுமை, தற்போது உள்ள பொறியியல், மருத்துவ படிப்பில் சேர்வதற்கான நுழைவுத் தேர்வுகள் குறித்து மாணவர்களுக்கு ஏற்படக்கூடிய ஒரு வித மன அழுத்தம் தற்கொலைகளுக்கு துாண்டப்படும் காரணங்களாக உள்ளன. மிக முக்கியமாக ஆண்கள் தற்கொலை முடிவு எடுத்து இறப்பு ஏற்படும் சதவீதத்தை காட்டிலும், பெண்கள் அதிகளவில் தற்கொலை அதிகரித்துள்ளது. இதற்கு தீவிர விழிப்புணர்வு ஏற்படுத்தி வருகிறோம்.