இடையன் குளத்திற்கு நீர் வரத்து தடை பட்டதால் நிலத்தடி நீர் ஆதாரம் பாதிப்பு மறுகால் ஓடை ஆக்கிரமிப்பால் விவசாயிகள் தவிப்பு

இந்த கண்மாய்க்கு மலைக்குன்றுகளில் இருந்து வரும் காட்டோடைகளின் நீர், 18 ஆம் கால்வாய் அமைக்கப்பட்ட பின் தடுக்கப்பட்டு விட்டது. ஐந்துக்கும் மேற்பட்ட ஓடைகளின் குறுக்கே தடுப்பணை கட்டியதால் வெள்ள நீர் தடைபட்டது. தற்போது 18 ம் கால்வாயில் தண்ணீர் திறந்து விடும் போது, கண்மாய்க்கு தண்ணீர் கிடைக்கிறது. புயல், மழை காலங்களில் 18 ம் கால்வாயில் முழு கொள்ளளவு செல்லும் போது, இந்த கண்மாய்க்கு நீர் திருப்பி விடப்படுகிறது.

ஆனால், கண்மாய் நிரம்பிய பின் நீர் செல்லும் மறுகால் ஓடை 2 கி.மீ. தூரத்திற்கு முழுவதும் ஆக்கிரமிக்கப்பட்டு இலவ மரங்களை வளர்த்துள்ளனர். இது ஒருபுறம் என்றால் கண்மாயில் மண் அள்ள வழங்கிய அனுமதியால் கண்மாய் பல இடங்களில் ஆழமாகி விட்டது.

இதனால் கண்மாய் முழுவதும் மேடு, பள்ளங்களாகி தூர் வார முடியாத நிலை ஏற்பட்டு உருமாறி உள்ளது. இதனால் குளத்தில் தண்ணீர் முழுமையாக தேக்க முடியவில்லை. முழு கொள்ளளவு தண்ணீர் தேங்காததால், நிலத்தடி நீர்மட்டம் உயர்வதில் சிக்கல் ஏற்பட்டுள்ளது.